Innhaldsrik skulesekk

Den kulturelle skulesekken er fast innslag i skulekvardagen rundt om i fylket. Elevane i både grunn- og vidaregåande skule får gjennom eit skuleår fleire besøk på skulen, eller dei reiser til eit større kulturhus for å sjå framsyningar. I år er november månaden med størst aktivitet og i tida framover vil åtte turnear vere ute på vegen. Utøvarane reiser gjerne på turne 15 - 20 dagar der det kvar dag er møte med nye elevar og nye skular. 

Musikk er alltid med i skulesekken og i haust er det er konsertar med artistar som "Benedicte Mauseth Trio", "Solo Cissokho" frå Senegal,  eller  formidling av "Joik".
Distriktsmusikarane i Sogn inviterer i sin turne elevane til å ta del i "ViTube" - ein konsert utanom det vanlige.

For dei yngste er det to musikkteater som reiser rundt.  "I berget det blå"  som byggjer på eventyret om tre kongsdøtrer, medan "Svanene over Irland" har utgangspunkt i Irske segn.  Begge har både skodepelarar og musikarar. 

Alle elevane i vg3 får eit tilbod gjennom  turneén "Radiobølgjer" som er knytt til Rolf Haugen si radioutstilling i Hornindal. Formidlar har med nokre radioar frå denne utstillinga og fortel om radioen si utvikling gjennom tidene, medan to  medarbeidarar frå NRK Sogn og Fjordane utfordrar elevane til praktisk å prøve korleis det er å arbeide som journalist i radio i dag.